Мученикам
Назад в разделНа главную

Авкту и Тавриону, глас 4:

Таврион славный и Авкт дивный, огневи противистася и всем инем казнем, / молитвами возмогающа; / та убо молением сердца похваляюще,/ верою пресвятую и честную память ею совершим,/ душам просвещение почерпающа.

Авраамию Болгарскому, Владимирскому чдтв., глас 4:

Днесь, благовернии людие, сошедшеся, / восхвалим добляго сего мученика и страдальца Авраамия, / сей бо, укрепляемь силою Божиею, / душу свою положи за Христа, / много пострадав от зловерных болгар. / Сего ради от Господа венец прият / и ныне предстоит Ему / и молится о граде сем / и о всех нас, чтущих память его.

Адриану, глас 3:

Богатство неиждивущее вменил еси / веру спасенную, треблаженне, / оставль отеческое нечестие / и Владыки стопами шествуя, / Божественными даровании обогатился еси, / Адриане славне; / Христа Бога моли / спастися душам нашим.

Акиндину, Пигасию, Аффонию, Елпидифору, Анемподисту и иже с ними, глас 2:

Страстотерпцы Господни, / блаженна земля, напившаяся кровьми вашими, / и свята селения, приимшая телеса ваша: / в тризнищи бо врага победисте / и Христа со дерзновением проповедаете: / Того яко блага молите спастися, молимся, душам нашим.

Александре, царице, глас 4:

Царства земнаго славу презревши, / Единаго Христа, нас ради распятаго, возлюбила еси / и, Того мужественно исповедающи, / венцем мученическим увенчалася еси, / всеблаженная царице Александро. / Темже и ныне Престолу Царя славы на Небесех предстоящи, / молися о спасении душ наших.

Ангели, новомч., глас 1:

Лик ангельский, Ангели новомучениче, / и сонмы страстотерпец / восплескаша выспрь твоему веры ради терпению / и прекословию / и дух твой по благомудрию возведоша на Небеса / со славою ко Христу Богу нашему.

Андрею Стратилату, глас 5:

Земнаго сана славу оставив, / Небесное Царство наследовал еси, / кровными каплями, яко пречудным камением, / нетленныя венцы украсил еси / и ко Христу привел еси собор страстотерпец. / С лики ангельскими в невечернем свете / незаходимаго Солнца Христа обрел еси, / святе Андрее Стратилате, / Егоже моли с пострадавшими с тобою присно, / да спасет души наша.
Кондак, глас 2:
В молитвах Господеви предстоя,/ якоже звезда солнцу предтекий,/ и желаемое сокровище Царствия узрел еси,/ радости неизреченныя исполняяся,/ Безсмертному Царю в бесконечныя веки,/ от Ангел беспрестани хвалимому поеши,/ Андрее Стратилате:/ с нимиже молися непрестанно о всех нас.

Антонию, Иоанну и Евстафию Литовским, глас 4:

Иже земных чести и славы отвергшеся, / доблии и честнии страдальцы, / ве­ры ради крепко и мужественно муки претерпесте, / на смерть себе вдавше за Живот всех - Владыку. / Темже и Христос преславно столпом облачным / с Небесе вас озари / и почестьми и венцы от Престола славы венча. / Со Ангелы Тому предстояще, / молите спастися душам нашим.
Ин тропарь, глас тойже:
От корене неплодна, преблаженнии,/ возрастивше Православныя веры ветви,/ первомучеником тезоименитии явистеся,/ злаго бо и нечестиваго князя ярости не убоястеся,/ повелевающа Христа отрещися./ Сего ради мученическия венцы приемше,/ и со Ангелы Престолу Владычню предстояще,/ о нас молитеся, преблаженнии,/ православно чтущих святую память вашу.
Кондак, глас 3:
Отеческую прелесть оставльше, святии,/ приведостеся Христови,/ всем души усердием стасте мужемудренно до смерти./ Темже и взясте победы почесть воистину,/ о всех Владыку нашего непрестанно моляще.

Арефе и с ним 4299-ти, глас 1:

Мужествовавше во Христе противу безбожнаго царя, / мученицы святии, / и того неверие иудейское во Христа обличивше, / прияша мук томление и главам усечение; / тем восхвалиша тя Ангели, / и верных роди тя прославляют, Арефо, / и пострадавших с тобою, / яко молящихся присно о душах наших.

Бояну, кн. Болгарскому, глас 4:

Якоже Авель, от суда братняго смерть приял еси / и кровь твою пролиял еси за Искупившаго ны честною Своею Кровию. / От земнаго же к Небесному преставився Царствию, / княже и мучениче Енравоте-Бояне, / моли Царя царей о нас, присных твоих.

Вере, Надежде, Любови и матери их Софии, глас 4:

Торжествует Церковь первородных, / и свеселится приемля матерь о чадех веселящуюся, / яже яко мудрости тезоименитая / тройственным богословским добродетелем равночисленныя породи. / Тыя с мудрыми девами зрит уневестившияся Жениху Богу Слову, / с нею и мы духовне в памяти их свеселимся, глаголюще: / Троицы поборницы, / Веро, Любве и Надеждо, / в вере, любви и надежде утверждайте нас.
Кондак, глас 1:
Софии честныя священнейшия ветви, Вера и Надежда и Любовь, показавшеся,/ мудрость обуиша еллинскую благодатию,/ и пострадавше, и победоносицы явившеся,/ венцем нетленным от всех Владыки Христа увязошася.

Вонифатию, глас 4:

К сословию послан мучеников, / мученик был еси истинен, / пострадав за Христа крепчайше, всехвальне, / мощми же возвратился еси верою пославшей тя, / Вонифатие блаженне, / моли Христа Бога / прияти нам грехов прощение.
Кондак, глас 4:
Священие непорочное самовольне Тебе привел еси,/ Иже от Девы тебе ради родитися Хотящему,/ святе венченосче, премудре Вонифатие.

Гавриилу Белостокскому, младенцу, глас 5:

Святый младенче Гаврииле, / ты за Прободеннаго нас ради от иудей / люте от онехже в ребра прободен был еси / и за Истощившаго кровь Свою за нас / все тело твое на истощение крове / в лютыя язвы предал еси, / ныне же во славе вечней с Ним вселился еси. / Тем помяни и нас, молим, зде чтущих память твою, / прося нам здравие телеси / и спасение душам нашим.

Георгию Новому, Софийскому, глас 4:

Божественным желанием от юнаго возраста / весь сам себе Господеви возложив, / в молитвах и постех образ быв добродетели, / богатство же, и славу, и доброродство телесное, яко не сущее, презрев, / и Христа единаго от души возлюбил еси, / и Того, истиннаго суща Бога, в Троице покланяема, / пред нечестивыми турки проповедал еси, / и, срацынскую веру, и законы Моамефовы под ногами поправ / и мучителя ужасив, / мучения венцем украсився, славне,/ к Небесным востекл еси ликостоянием, / премудре Георгие. / Моли Христа Бога / сохранити отечество твое и спасти люди и град, / иже твоя подвиги присно почитающия.

Гурию, Самону и Авиву, испп., глас 5:

Чудеса святых Твоих мученик / стену необориму, нам даровавый, Христе Боже, / тех молитвами советы языков разори,/ Церковь святую укрепи, / яко един Благ и Человеколюбец.

Девяти мученикам Кизическим, глас 8:

Святии девяточислении мученицы, / от различных градов во един лик совокупившеся манием Божественным, / мужественно за Христа пострадасте, / невидимаго врага победисте, / зловерныя князи и мучители посрамисте вашим терпением, / огнем же любве Божия разжизаеми, / вещественно вас огнь мучащий в хлад преложисте, / темже дадеся вам от Христа Бога благодать / трясавичную исцеляти болезнь, / от неяже и многовидных страстей, / милостивно спасайте и нас предстательством вашим, молимся.

Диомиду, врачу, глас 3:

Мучительнии сосуди устроиша ти путь к Небесем, / Христов воине Диомиде, / победив диавольския козни, / и на Небесех у Христа прославися, / молися за творящих верою память твою.

Евстратию, Авксентию, Евгению, Мардарию и Оресту, глас 4:

Мученик всечестных светлость,/ пяточисленных страстотерпцев воспоем, / славу земных презревших, / солнца светлаго Евстратия, / премудраго витию со страдальцы, / на огнь и муки дерзнувших за всех Царя Христа / и от Престола Того славы почестьми венцев обдаренных. / Тех молитвами, Христе Боже, / спаси души наша.

Иоанну-Владимиру, кн. Сербскому, глас 4:

Крест, явльшийся тебе с Небесе, светел проповедал еси, / просветив языки ясно, Владимире славне, / обагреньми кровей твоих украсився, / сподобился еси почестей нетленных, / предстояй Троице, / тем со дерзновением / моли спастися нам.

Иоанну Воину, глас 4:

Всеблагаго Бога и Царя / благоверный раб и воин явился еси, / Иоанне чудодетелю, / пострадав бо ради веры мужески, / блаженне же скончав течение, / зриши Всетворца Господа в небесех светлейше. / От Негоже прием дарование чудес, / страждущим человеком во всяких напастех помогаеши, / укрепляеши воины в ратех, / от врагов пленения, / ран же и внезапных смертей / и от бед лютых изымаеши. / Темже моли Владыку Христа, приснопамятне, / да во всяком обстоянии сотворит нам милость, / и не введет нас во искушения, / но спасет души наша, яко Человеколюбец.

Иоанну Казанскому, мч., глас 2:

Страстотерпче святый Иоанне, / блаженна земля, напившаяся крове твоея, / Христа бо со дерзновением проповедав, / многия муки от неверных агарян приял еси, / страданьми своими противных дерзости низложив, / Троицы поборник явился еси, / Юже и моли даровати нам велию милость.

Иоанну, бывшему Моавию, царю Персидскому, и иже с ним трем отрокам, глас 6:

Иже ко Христу верою / болезнь телесную исцели, с неюже и душевную, / наставляемь от честнаго твоего учителя Феодора, / славный царю Моавие Иоанне, / и, страдание по Христе купно с верными твоими треми отроки скончав, / явися в царех мученик, в мученицех же царь, / по Христе течение скончав, от своих раб волею пострада, / и, сугубу честь от Бога приим, / Егоже моли купно с треми верными твоими отроки / спастися душам нашим.

Иоанну, Стефану, Петру, Борису, Иакову, Феодору, Сильвану, Феодору, Василию, Феодору, Димитрию, Михаилу, Иоанну и Василию Казанским, глас 1:

Молитвами Твоих мучеников, Господи, / благочестие в стране Казанстей насадися, / и, яко пламенем огненным. / Православной верой Восток озарися, / и ныне их предстательством, Человеколюбче, / не помяни беззаконий наших, / но утверди нас в вере истинней / и мир подаждь, молимся Ти.

Иулиану Тарсийскому, глас 1:

Светлыя постничества подвиги, / радуяся, понесл еси, Иулиане Богоблаженне, с преподобною Василиссою, / и страдания добльственно претерпел еси / с честными твоими сострадальцы, / с нимиже моли Христа Бога / спастися душам нашим.

Киру и Иоанну, безсребреникам, глас 5:

Премудрии вселенней врачеве, / Кире и Иоанне, / от Бога приясте власть целити недуги душевныя, / вкупе же и телесныя, / и ныне молитеся / сохранити град и люди от одержащих зол / и спасти молитвами вашими души наша.

Кирику и Иулитте, глас 8:

Яко лоза благоплодная, Иулитто честная, / грозд зрел принесла еси Цареви, всех Богу, / сына твоего Кирика славнаго, / мучением того богатно украсивши / и твоею кровию навершивши, / тем и дарова тебе Вышний возмездие в Вышних, / идеже ликующе, помяните нас, мученицы терпеливодушнии.

Конону Исаврийскому, глас 4:

Яко девственника предивна / и мученика непоколебима, / блаженнаго страдальца, / на бесы власть приемшаго, / Конона песньми восхвалим и к нему возопиим: / моли Христа Бога, / да спасет души наша.

Людмиле, кн. Чешской, глас 4:

Оставльша тьму идолослужения / и с горячей любовию прияв свет Православныя веры Христовы, / явися ты, святая Людмило, яко звезда утренняя, / и светом святости твоея / истинный день Богопочитания в Честей земли начав.

Маркиану и Мартирию, глас 1:

Мученик двоица единонравная, / Маркиан с Мартирием славным, / Ариево нечестие разрушиша / и Соприсносущна Сына Отцу и Духови веровати научиша, / Павлу повинующеся истинных повелений учителю, / темже мечем убиени, умроша; / и присно со Христом живуще, / о нас Того молят спасти души наша.

Меркурию Смоленскому, воину, глас 2:

Возсияв, яко звезда многосветлая, / в соборней церкви пред пречистым и чудотворным образом Пречистей Богородицы, / за Нюже и за град Смоленск пострада, / многокозненнаго и богомерзкаго царя Батыя устраши, / и сильнаго исполина победи, и люди удиви, / душу свою, многострадальне Меркурие, за благочестие положи, / яко Захариина и Авелева ясно вопиет твоя кровь ко Господу. / И ныне молися за души наша.

Мине, Ермогену и Евграфу, глас 8:

Воздержанием страстей огнепальныя / умертвивше зраки и движения, Христовы мученицы / прияша благодать недуги отгоняти немощных / и живше и по кончине чудодействовати. / Воистинну чудо преславно, / яко кости наги источают исцеления, / слава Единому и Создателю Богу.

Миропии, глас 1:

Добромученице Миропие и Христа невесто нетленная,/ ныне Емуже предстоиши, прекрасная, / раны носящи плоти, / яко камни светлы и светообразны,/ и в кровавую порфиру, яко царица, облеченная, преславная, / умоли Его за ны, / яже с любовию восхваляющия / хвалы победными и песньми твою Божественную страсть.

Михаилу сновидцу, глас 5:

От добляго наставника Феодора / чистоту твердо извыче, / и от нечестия царицы Сеиды / целомудрием по образу Иосифа сохранися,/ такоже и нечестиваго царя Адрамелеха / премудрыми твоими глаголы прения и ласкания низложив,/ и по Христе мучения венцем увязеся,/ Богомудрый Михаиле,/ Егоже моли спасти души наша.

Михаилу, кн. Черниговскому, и болярину его Феодору, чдтвв., мчч. и испп., глас 4:

Жизнь вашу мученически совершивше, / исповедания венцы украсившеся, / к небесным востекосте, / Михаиле премудре с доблим Феодором, / молите Христа Бога / сохранити отечество наше и люди, / по велицей Его милости.

Тем же святым (Перенесение мощей), глас 8:

Троичнаго Божества осиянием просветився, / страстотерпче великий княже Михаиле,/ с премудрым болярином ти Феодором,/ самозванна к подвигом устремистася,/ сквозе огнь не идоста,/ кусту же и идолом не поклонистася, но оплеваста / и нечестиваго царя обличиста,/ Христа же Единаго от Троицы Бога Суща исповедаста./ И того ради кровей своих струями обагристася, славная./ Темже и венцы от Него победная прияста,/ и нас свыше назираета,/ молим вас, святыя, молите Того,/ яко да вашими молитвами избавит нас от всяких обстоящих ны зол / и подаст нам вся благая,/ Иже Един Сый прославляемый во святых Своих.

Величание:

Величаем тя, / благоверный княже Михаиле, / и с болярином твоим Феодором,/ и чтим святую память вашу,/ иже за Христа кровь свою излиясте, / и ныне молите за нас Христа Бога нашего.

Неделе (Кириакии), глас 3:

Одолением чудесным / победила еси вражия силы до конца,/ Недело преславная,/ идоложрения бо тьму / далече Креста честнаго светлостию прогнала еси./ Мученице всехвальная, / Христу Богу молися / даровати нам велию милость.

Николаю II, Императору Российскому, св. блгв., глас 5:

Царства земнаго лишение, / узы и страдания многоразличныя / кротко претерпел еси, / свидетельствовав о Христе даже до смерти от богоборцев,/ страстотерпче великий Боговенчанный царю Николае, / сего ради мученическим венцем на небесех, / венча тя с царицею и чады и слуги твоими Христос Бог, / Егоже моли помиловати страну Российскую / и спасти души наша.

Оресту, врачу, глас 4:

Удом усекновение терпел еси / и огненную лютую муку, мучениче, / подвигся, всеславне, / венцем яве увязеся нетленным, преблаженне, / Престолу же предстоиши Святыя Троицы, / Юже помоли, да спасет ны, / мучениче Оресте, верою поющим тя.

Параскеве (Пятнице), глас 4:

Премудрая и всехвальная Христова мученица Параскева, / мужескую крепость приимши, / женскую же немощь отвергши, / диавола победи и мучитиля посрами, / вопиющи и глаголющи: / приидите, тело мое мечем ссецыте и огнем сожгите, / аз бо, радующися, иду ко Христу, Жениху моему. / Тоя молитвами, Христе Боже, / спаси души наша.

Петру и Стефану, Казанским, глас 4:

Мучеников двоица единонравная, / Стефане и Петре славнии,/ неверие соплеменников обличивше,/ Христу последовали есте,/ во Святую Троицу веровати всех научающе, / Еяже ради великия страдания приемше, / молитеся о нас ко Господу, / да, избавившеся тьмы греховныя, / Света явимся общницы невечерняго.

Прову, Тараху и Андронику, глас 5:

Святых мученик исправлением / Небесныя силы преудивишася, / яко в теле смертнем, / безтелеснаго врага силою Креста, / подвизавшеся добре, победиша невидимо. / И молятся Господу / помиловатися душам нашим.

Савве Стратилату и с ним 70-ти воинам, глас 5:

Земнаго сана пояс оставив и почести, страдальче, / пред мучителем, льстивым царем, Христа Бога суща исповедал еси, / и Того ради многа страдания подъял еси, славне, / тем прекрасным победы венцем увязлся еси от Царя всех царствующаго, / с небесными вои светло преукрашен. / Предстоя Тому, Савво, моли, / да спасет души наша.

Серафиме деве. Римской, глас 8:

Невесто Христова возлюбленная, Серафимо, / наследнице Царствия Небеснаго, / добре за Господа пострадавшая / и кровию твоею обагренная / и, аки царскою багряницею, украшенная, / поминай нас, совершающих святую память твою.

Сергию и Вакху, глас 5:

Удобрение Христовых страстотерпец / и очи Христовы Церкве, / очи просветите душ наших, / Сергие многострадальне и Вакше преславне: / молитеся ко Господу, / яко да убежим тьмы греховныя / и Света явимся общницы невечерняго / молитвами вашими, святии.

Сорока мученикам Севастийским, глас 3:

Страстотерпцы Христовы четыредесяте, / во граде Севастийстем мужествен­но пострадавшии, / чрез огнь и воду прошедшии, / в покой вечный вшедшии, / молитеся о нас ко Господу / да жизнь мирну сохранит / и души наша спасет, яко Человеколюбец.

Стефану Дечанскому, царю Сербскому, глас 4:

В терпении добрострадальных под­виг твоих / многообразныя раны претерпел еси, / и по кончине своей / венец от Бога с мученическими лики восприемлеши, / и в земли кротких достойно водворяешися, блаженне, / о нас Христа Бога моли / даровати душам нашим велию милость.

Тому же святому (Перенесение мощей), глас 8:

Царскую диадиму обагрил еси кровию твоею, Богомудре великомучениче, / за скиптр крест в руку приим, / явился еси победоносец / и яко жертву непорочну принесл еси себе Богу. / От родителей твоих очию зеницы лишен был еси, и в заточении пребыл еси, / и от своих удавлен еси. / И ныне, радуяся, предстоиши Святей Троице. / Тем празднуем днесь пренесение честных мощей твоих / и обновление честнаго кивота, / блаженне Стефане, молися о державе сродник твоих, / благоугодней быти ей / и сыновом сербским спастися.

Трофиму, Савватию и Доримедонту, глас 8:

В Троице хвалимый Бог, троицу мученик прослави, / Трофима и Савватиа и Доримедонта: / в того бо веровавше, врага низложиша. / Тех молитвами, Христе Боже наш, помилуй нас.

Трофиму, Феофилу и с ними 13-ти мученикам, глас 4:

Яко воини, мученицы непобедимии, / течением невозбранным в судилище неверных внидосте / и веры ради многия муки претерпесте, / Христа исповедающе Единаго со дерзновением. / Того молите, Трофиме и Феофиле с прочими, / яко да тяготу страстей отложше, / ваше ныне страдание поем, страстотерпцы непреоборимии.

Уару и с ним семи учителям христианским, глас 4:

Воинством святых страстотерпец / страждущих законно, / зря онех, показал еси мужески крепость свою. / И устремився на страсть волею, / и умрети вожделе за Христа, / Иже приял еси почесть победы твоего страдания, Уаре, / моли спастися душам нашим.

Фекле, равноап., первомц., глас 4:

Словесем Павловым научившися Богоневестная Фекло, / и верою утвердившися от Петра Богозванная, / первострадальница в женах, / возшла еси на пламень, яко на место благоцветущее,/ звери и юнцы устрашишася тебе, вооружися бо Крестом./ Тем моли всехвальная Христа Бога,/ спастися душам нашим.

Феодору варягу и сыну его Иоанну первомчч. Российским, глас 2:

Страстотерпцы Господни, / Феодоре со Иоанном отроком, славнии! / Блаженна земля Русская, напившаяся кровьми вашими, / и радуется отечество наше, / в немже вы первии, идолы посрамивше, Христа со дерзновением исповедаете / и за Него пострадаете. / Того, яко Блага, молите, / до скончания века в стране нашей Церковь Православную непоколебиму утвердити / и всех русских людей во истинней вере и благочестии сохранити.

Феодосии деве, Тирской, глас 4:

Добродетель благоприятно, мученице, постигла еси, / Христово приятелище бывши чистое / и Святаго Духа дом возлюблен; / отонудуже посрамила еси врага, борющаго род человеческий, / добре страдавшая, / и посекла еси Копронима, Феодосие, мечем веры, / и к чертогу Небесному преставилася еси, радующися. / Тебе верою чтущим / присно проси велия милости.

Флору и Лавру, глас 4:

Преудобренную и богомудрую двоицу пресветлую / восхвалим, вернии, по достоянию, / Флора преблаженнаго и Лавра всечестнаго, / иже усердно Троицу несозданную ясно проповедаете всем, / темже пострадавше до крове, / и венцы пресветлыми увязостеся, / молитеся Христу Богу, да спасет души наша.

Христине Тирской, глас 4:

Званием евангельски Христу уневестившися, / Христино славная, / славу мира сего и похоть бренную вменила еси ни во что же, / о самом телеси не брегущи, / муки претерпела еси доблественно, / тем твое страдание хвалами почитаем, / мученице, Христу тезоименитая.

Христофору, Ликийскому, глас 4:

Одеждами от кровей украшаяся, / Господеви предстоиши, Царю сил, Христофоре приснопамятне, / отонудуже со Безплотными и мученики поеши / трисвятым и страшным сладкопением. / Темже молитвами твоими спасай стадо твое.

10-ти мученикам Критским, глас 3:

Многочудный Крит почтим, / процветший честныя цветы, / Христовы бисеры, / мучеников сорасленых, / десять бо суть числом, блаженнии, / иже весь идольский народ посрамиша, / темже и венцы прияша, / добледушнии.

45-ти мученикам Никопольским (Армянским), глас 1:

Единоумне душею связани бывше, / четыредесять с пятьми страдальцы святии, / на врага ополчистеся, / победителие же явльшеся, / приясте венцы от Христа Бога / и вечное мучений ваших воздаяние, / тыя и нам улучити молите, / благочестно песньми вас величающим.

14000-м мученикам младенцам, от Ирода в Вифлиеме избиенным, глас 1:

Болезньми святых, имиже о Тебе пострадаша, / умолен буди, Господи, / и вся наша болезни исцели, / Человеколюбче, молимся.

20000-м мученикам Никомидийским, глас 2:

Страстотерпцы Господни, / блаженна земля, напившаяся кровьми вашими, / и свята селения, приимшая телеса ваша: / в подвизе бо врага победисте / и Христа со дерзновением проповедаете. / Того, яко Блага, молите / спастися, молимся, душам нашим.


Назад в разделНа главную